مش هدي مقدمات كتير و مفيش فيا لا حيل و لا تركيز اني اظبط دباجات و اجمل كلمات ولا الكلام ده كله .. يعني ببساطه و من الاخر دول كلمتين محشورين في زوري و عاملينلي صداع و مغص - بالاضافه لمغص قنابل المشير الغازيه – هقولهم و اسيبكم تفكروا فيهم براحتكوا بقى.
ليه المجلس العسكري لازم يمشي:
1- هو احنا اللي قلنا للمجلس يمسك البلد او يتولى الفترة الانتقاليه اصلا ؟؟؟ مش المخلوع هو اللي جابه و ركبه على انفاسنا .. يعني بقى بالذمه ينفع واحد شعبه خلعه يقوم يلبسنا في الحيط بمجلس معمول على ايده و احنا نسكت .. و اللي يغيظك بقى ان الدستور القديم مفيهوش حاجه اصلا اسمها نقل صلاحيات رئيس لاي هيئه او مجلس بمزاجه!! هتقولي يا عم دي ثوره يعني الدستور لازم يسقط صح ولا ايه؟؟ هرد عليك في النقطه التانيه.
2- ايوه يا سيدي الدستور لازم يسقط .. بس هو الدستور سقط فعلا ؟؟
قلنالهم ثوره يعني تغيير دستور و المطلوب جمعيه تأسيسيه تحطلنا دستور توافقي عدل نمشي عليه .. قالك خلاص نسئل الشعب و راحوا عاملين الاستفتاء بتاع مارس و كان الاستفتاء على شكل عمه ايفوها و ظبطوها و لبسوهالنا صح .. ليه يابن عمي ؟؟ هقولك عشان الاستفتاء كان على تعديل تسع مواد في دستور 71 بتاع السادات و ده معناه ان دستور 71 مش هيسقط و هيتعدل فيه بس بعض المواد .. قعدنا نقولكم قولوا لا للتعديلات عايزين دستور جديد يا خوانا .. قاموا ضحكوا عليكم بالاستقرار و ان لا معناها وقت اسرع و طلقوا علينا اخوانهم و سلفييهم قالك نعم مع ربنا و لا هتوديك النار و كانت النتيجه ان طلع علينا ابو دقن بيضه و عنين خضرا و قالك الصناديق قالت للاسلام نــــعم .. النكته اللي تضحك و تحزن بقى انه بعد التعديل الدستوري اللي كان على مواد بس في دستور 71 رزعونا في نافوخنا اعلان دستوري فيه اكتر من 60 ماده ....
يعني استفتينا على تعديل مواد عملولنا اعلان دستوري .. استفتونا فيهم على 9 و لبسونا الباقي عشان يدوا نفسهم شرعيه مزيفه واخدينا بلعبة تلات ورقات .. و اللي يغيظك اننا لا عملنا دستور ولا الاعلان الدستوري متنفذ منه حاجه و لا الاستقرار ده حصل اصلا ....
3- بمناسبة الاستقرار بقى .. حد منكم يا حلوين يعرفلي كلمة استقرار دي و النبي .. اقولكم انا ببساطه كده الاستقرار ده انواع .. استقرار اقتصادي استقرار اجتماعي استقرار امني .. طيب تعالوا نشوف كده المجلس العظيم قدر يحقق اي نوع من انواع الاستقرار خلال العشر شهور اللي فاتوا .. اولا اقتصاديا : المجلس مخدش اي قرارات حقيقيه تقدر تمنع ارتفاع الاسعار المهول اللي حصل من اول الثوره مقدرش حتى انه يتحكم في وضع سقف معين للارتفاع ده و برغم انه يمتلك اراضي و مزارع و مقومات كتير تساعده على غزو السوق اجباريا و تحديد الاسعار الا انه مفكرش حتى في كده و ساب الناس ضحيه لارتفاع اسعار غير عادي .. في الوقت نفسه محطش اي تصور لحد النهارده للحد الادني و الاقصي للاجور يعني ساب الاسعار تولع و الناس لسا بتاخد ملاليم .. لسا الشكاوى و المظالم من الناس بتوع المعاشات و اللي عايزين يتثبتوا او ترتفع اجورهم متحلش منها قضيه واحده .. اجتماعيا برضه الملس ماخدش اي قرار او حتى توجه لاشعار الناس باهمية وجوده او بأن في ثوره حصلت في البلد كل همها ان الشعب يعيش زي مايستحق دي حتى الزباله اللي ملت الشوارع الاهالي و الاحزاب هما اللي بقوا يلموها .. امنيا بقى حدث ولا حرج و لو جبنا ارقام هنصاب بهلع و عته لما نعرف ان حالات البلطجه و السرقه بالاكراه و الاغتصاب وصلت لمعدلات بشعه و ان السلاح بقى في ايدي الجميع و محدش بيتحرك و ان في اكتر من ربع مليون عربيه مسروقه .. يعني اللي عمالين يزلونا انهم بيحموا البلد مقدروش يحموها من شوية بلطجيه .. هتقولي دي مهمة الشرطه هقولك ان المجلس هو حاكم الدوله و حاكم الدوله دستوريا هو رئيس المجلس الاعلى للشرطه غير ان عندهم شرطه عسكريه فالحه بس تنزل فينا احنا ضرب و اهانه ... يبقى اين الاستقرار بقى يا عزيزي المستقر !؟
4- مصنع الرجال (الجيش) سايب رجالته بتموت على الحدود و حتى مدربش شمروخ من بتوع الالتراس عشان يحميهم .. ده حتى موجهش خطاب شديد اللهجه و طالب باعتذار رسمي (على رأي الجرايد) من الحكومه الاسرائيليه .. لا ده فالح بس يعملي سور حوالين السفاره و لما يرجع سفيرهم اول امبارح يروح وزير الخارجيه يستقبله في المطار .. يعني سفيرهم اهم من وزيرنا !! و معلش يعني تساؤل غلبان كده: لما المجلس يقولك ان المدرعه اتسرقت من ادام ماسبيرو امال لو دخلنا حرب هيحصل ايه ؟؟ حد يقول للمجلس ياخوانا اللي تتسرق مدرعته بكره يتسرق.......
5- قالك الشرطه العسكريه كانت واقفه بتحمي ماسبيرو و هما غير مسلحين .. لا و النبي امال كانوا بيحموا المبنى ازاي بالدعاء على راي باسم يوسف ولا ماسكين نِبَل و لا متوقعين ان منظرهم بس هيخوف الناس .. اظن لو اتكلمنا على ماسبيرو و احداثها هنضطر اننا نعمل جمعيه و نسلف المجلس عشان يقدموا في دوره في"ازاي تكدب و ماتتقفش" .. و قيس على احداث ماسبيرو كل الاحداث الطائفيه اللي المجلس متدخلش تماما عشان يحلها و سابها لرجال الدين و العشائر زي مانكون عايشين ايام قبائل قريش مش في دولة قانون .. و طبعا في الاخر يرميلك المصيبه على الكائنات الفضائيه الخضرا اللي بتلات عيون و سبع ايدين اللي بتنزل من المريخ تضرب الجيش و المتظاهرين و تجري تلحق سفينتها الفضائيه من موقف عبد المنعم رياض.
6- هنفترض ان في طرف تالت يا سيدي .. الطرف التالت ده انت مش عارفه يا مجلس؟؟ لو مش عارفه تبقى مصيبه و يبقى من الطبيعي اقولك شكرا اول على قد كده اتفضل بقى على جنب لانك ماتستحق ادارة البلاد و لو عارفه تبقى المصيبه اكبر لانك اما انك مش قادر تتعامل معاه او انك متواطيء معاه و في الحالتين برضه ماتستحقش ادارة البلاد .. و احب افكركم ان المجلس بنفسه في اكتر من مناسبه قال ان الازمه في فلول النظام السابق (على اساس ان المجلس نفسه مش من النظام السابق).
7- مش في ايد المجلس انه يريحنا من نغمة الفلول دي؟؟ ليه لحد دلوقتي قانون العزل ماتنفذش ؟ ليه قرار المحكمه بمنع ترشح اعضاء الحزب الواطي اتلغى ؟ ليه المحاكمات اللي المفروض كانت تستمر يوميا بقت تتأجل بالشهرين و التلاته و ياعالم هتخلص امتى ؟ ليه لحد دلوقتي ماشفناش حد اتحكم عليه بيومين حتى في قضية قتل متظاهرين او قضية موقعة الجمل اللهم الا امين الشرطه السوبر مان اللي طلع هو اللي قتل كل المتظاهرين و هو اللي اكل الجبنه .. ليه لحد دلوقتي يا مجلس سايب الفلول ينغصوا عليك عيشتك و يخلونا نتهمك ظلما و بهتانا يا عيني ؟؟
8- قمة العبقريه هي اني لو عندي بكره امتحان انجليزي اقعد اذاكر فرنساوي .. بس العبقريه الاكبر هي لما قوى ليبراليه او يساريه تطلب طلب اروح قاعد مع الاسلاميين اقولهم طلباتكم ايه يا بشوات .. و العبقريه الاعظم بقى كمان اني عشان ماقولش اني غلطان في الاعلان الدستوري اللي اتكتب في غفله من الزمن و العقل اروح عامل وثيقه دستوريه لا ليها لون ولا طعم و مش مطلوب منها غير انها تعملنا بلد جوا بلد او على الاقل تصحح غلط سياسي المجلس غلطه .. اما انك مالكش فيها (السياسه يعني) او انك بتلف و تدور و تلعب بينا .. و عملا بقول عبقري العباقره عمرو مصطفى اسمحلي اقولك لا بقى تعلالي في ملعبي هتلاعبني هلاعبك انت في الحالتين لا تصلح لقيادة البلد يا حج.
9- الجمله دي بقى للاخوان اللي باعونا في الميدان .. نصيحه يا حبايبي الانظمه الشموليه اللي زيكم و زي العسكر اول ما بتاكل بتاكل بعضها ارجعوا للشارع و خليكوا مع الناس عشان لو المجلس ركب هتبقوا انتوا اول ركوبه لا مؤاخذه.
10- الجمال يوم موقعة الجمل عدت من ادام الشرطه العسكريه اللي فتحتلهم الطريق و كلنا شفنا ده في التليفزيون .. احداث التحرير و الثوره التانيه دلوقتي حصلت نتيجة امر باخلاء الميدان من 150 معتصم من المصابين و ده قرار سياسي مش امنى يعني كان في ايد المجلس العسكري .. اللي دخلوا فضوا الميدان و رموا جثث المصريين في الزباله و جروا البنات من شعورهم و ضربوا الاموات و ارتكبوا جرايم تحرش جنسي ضد البنات كانوا عساكر شرطه عسكريه .. العيسوي قال انه من يوم الحد و هو مش مسؤول عن الداخليه و انها في عهدة لواء من الجيش يعني كل ده حصل بأمر مباشر من اللواء ده اللي بيمثل المجلس .. الكذب بان و اتفضح لما قالوا مابنضربش اي رصاص من اي نوع على المتظاهرين و كلنا شفنا بعنينا الكلب بتاع جدع يا باشا جت في عين الواد .. القنابل العجيبه اللي صناعها نفسهم حرموا استخدامها مش معقول انها تكون بتتضرب على الناس من غير علم المجلس .. يعني المجلس هو المسؤول الاول عن اهانة المصريين و قتلهم و سحل جثثهم و كل الجرايم اللي شفناها على الهوا في التليفزيون.
11- بالمناسبه الناس اللي بتقول ان الثوار هما اللي بيتحرشوا بالشرطه في شارع محمد محمود عشان يقتحموا وزارة الداخليه احب اقولهم معلومه بسيطه و ظريفه جدا: وزارة الداخلية مش في شارع محمد محمود اصلا .. و الشارع اللي فيه وزارة الداخليه فاضي يعني لو كان حد عايز يقتحم الوزاره كان اقتحمها من اول يوم يا بشر.
12- عجلة الانتاج اللي قرفونا بيها دي بقى مين اللي فساها .. الثوار ؟؟ طيب عملت ايه عشان تحافظ عليها بقى يا مجلس .. طيب عملتوا ايه يا مصريين ياللي ضد بلطجية التحرير ؟؟ و اي بلد محترمه في الدنيا يبقى اقتصادها قايم على البورصه ؟؟ المصريين بيروحوا اشغالهم و التليفزيون انتج مسلسلات جديده و عمرو نزل البومه و المصانع شغاله و السبكي لسا بينتج افلام و لسا الشباب كل يوم على القهوه بيلعبوا بلاي ستيشن يبقى حصل ايه بقى لعجلة الانتاج ما الحياه لونها بمبي اهو يا راجل .. و لو هو اقتصاد البلد متبهدل اوي كده تروح تضرب قنابل غاز في تلات ايام باكتر من 15 مليون جنيه معنى كده انك شاري قنابل جديده ب100 مليون على الاقل .. مش فلوسنا دي برضه يا بيه؟؟
13- دي بقى هسيبها للي في نفسه حاجه و عايز يقولها .. انا ممكن اكون نسيت حاجات كتير بس زهقت و صوابعي وجعتني فكملوا انتوا بقى ..
اظن عرفتوا ليه الغازيه لازم تنزل و المجلس لازم يخلع .. الثوره المصريه ثوره مدنيه خالصه لا هيركب عليها عسكر ولا غيره .. و البلد دي لازم يحكمها ولادها من المدنيين و السلطه لازم تتسلم للمدنيين في اسرع وقت ممكن.
و على غرار يسري فوده في ختم مقالاته:
افهموا و تفكروا يرحمكم الله و يرحمنا معكم
share it
ليست هناك تعليقات:
إرسال تعليق